Sexuell Zoustëmmung ass en entscheedende Sujet fir sécher a respektvoll Bezéiungen ze garantéieren. Leider gëtt dëst Konzept oft falsch verstan oder falsch ugewannt. An dëser Newsletter wäerte mir d'Konzept vum sexuellen Consentement zesummen entdecken, firwat et wichteg ass, a wéi mir alleguer dozou bäidroe kënnen, datt dëst an eisem Liewe respektéiert gëtt.
1. Wat bedeit eigentlech „sexuellen Consentement“ oder „sexuell Zoustëmmung“ ?
Sexuell Zoustëmmung ass e kloren, fräiwëllegen a géigesäitegen Accord un enger gemeinsamer sexueller Aktivitéit deelzehuelen. Dës Awëllegung kann nëmmen op fräiwëlleger Basis gi ginn, ouni Drock, Manipulatioun oder Aschüchterung. Och muss d'Zoustëmmung ausdrécklech sinn – et ass net, well eng Persoun net "Nee" seet, datt dat automatesch heescht, dass si averstanen ass.
E puer wichteg Zuelen:
• 24% vun de Jonken tëscht 15 a 25 Joer hunn eng sexuell Bezéiung mat enger Persoun missen erliewen, déi et ausgenotzt huet, dass si ënner Afloss vun Drogen oder Alkohol stoung. Si konnten hire Consentement also net ginn.
• 1 vu 5 Persounen huet e sexuellen Iwwergrëff virun hirem 18. Liewensjoer erlieft.
• 80% vun de Vergewaltegungsaffer kennen hiren Täter..
• 70% vun den Affer hunn den Iwwergrëff net bei der Police gemellt.
Dës Zuele weise wéi wichteg et ass, iwwer d’Thema vum sexuellen Consentement opzeklären!
2. Firwat ass et wichteg, d’Awëllegung vun enger Persoun ze froen?
De Consentement vun enger Persoun ze froen an ze respektéieren, heescht dës Persoun als Individuum ze respektéieren. Wann eng Persoun e sexuellen Iwwergrëff erlieft, kënnen d'Konsequenze gravéierend sinn: Verloscht vum Vertrauen, Angscht, Depressioun an nach vill méi. De Consentement vun enger Persoun net ze respektéieren, ass eng Gewaltdot, et heescht d'Würd an d'Grondrechter vun der anerer Persoun ze verleegnen an ze verletzen.
Beispill: Stellt Iech vir, Dir hutt zougestëmmt, mat enger Persoun ze danzen, mee dës Persoun fänkt un, mat Iech intim wëllen ze ginn, ouni ze iwwerpréiwen, ob och dëst fir Iech ok ass. Dës Verletzung vun Ärer Awëllegung kann Iech veronsécheren, et ka maachen dass Dir Iech verrot fillt respektiv traumatiséiert.
De Consentement ass e fundamentaalt Recht! An dëst Recht muss respektéiert ginn, fir datt jidderee sech sécher a geschätzt a senge Bezéiunge fille kann.
3. Wéi kann ech meng Awëllegung kloer ausdrécken an opmierksam sinn op déi vun aneren:
Wéi kënnt Dir Är eegen Zoustëmmung kloer ausdrécken ?
• Benotzt einfach an direkt Wierder: "Jo, ech fille mech wuel domat" oder "Ech wëll net méi wäit goen wéi dat hei."
• Traut Iech "Nee" ze soen: Äert Wuelbefannen an Är Sécherheet sinn déi éischt Prioritéit.
• Denkt drun, datt Dir zu all Moment Är Meenung ännere kënnt: D'Zoustëmmung ass reversibel.
Wéi kënnt Dir oppassen, op Äre Géigeniwwer seng/hir Zoustëmmung ginn huet ?
• Préift reegelméisseg no : "Ass nach ëmmer alles ok fir dech ?" oder "Mir kënnen ophalen, wann s de wëlls."
• Passt op d’Kierpersprooch op : Wann Dir mierkt, dass déi aner Persoun nervös, onsécher oder onconfortabel ass, stoppt a sicht d’Gespréich mat Ärem Géigeniwwer.
• Maacht keng Vermuddungen: Just well den "Nee" net ausgeschwat gouf, heescht dat net, dass d’Zoustëmmung garantéiert ass. Frot ëmmer a lauschtert no.
Beispill: Dir sidd amgaang, eng Persoun ze kussen, mee Dir mierkt, datt dës Persoun ofgelenkt oder nervös wierkt. An dem Fall haalt Dir op a frot: "Geet et? Mir kënne méi lues maachen oder ganz ophalen, wann s du dat wëlls." Dës einfach Fro weist Respekt a suergt dofir, datt Dir allebéid op der selwechter Wellelängt sidd.
Conclusioun
De sexuellen Consentement ass fundamental an alle Bezéiungen. Duerch d'Gespréich iwwer déi perséinlech Awëllegung droe mir dozou bäi, en Ëmfeld ze schafen, an deem sech jidderee respektéiert a sécher fillt. Passt op Iech op a passt och op déi Aner op, andeems Dir de Consentement ëmmer respektéiert.
Fir ofzeschléissen, wëlle mir Iech drop opmierksam maachen, dass de Service infoMann op Rendez-Vous fir Iech do ass, wann Dir de Besoin verspiert, iwwer des Thematik ze schwätzen oder méi doriwwer gewuer ze ginn. Eis Partner a Partnerinnen, déi mir hei ënnendrënner opgelëscht hunn, stinn Iech och zur Verfügung fir Iech ze ënnerstëtzen.
Falls Dir Affer vun engem sexuellem Iwwergrëff gi sidd, ass et wichteg, sech bei der Police ze melle fir den Tëschefall ze mellen. Zousätzlech dozou ginn et Berodungs- a Supportservicer, deenen hir Missioun et ass, Iech ze begleeden an opzefänken.
Ressourcen:
• Femmes en dĂ©tresseÂ
• Fondation Maison de la Porte OuverteÂ
• PROFAMILLIAÂ
• Planning FamilialÂ
• D’LIGUE:Â
• Police Grand-Ducale TĂ©l. : 113Â
• Centre UMEDOÂ
